अयातुल्ला अलिरेझा अराफी इराणचे नवे हंगामी सर्वोच्च नेते

वृत्तसंस्था/ तेहरान

तेहरानमध्ये अली खामेनेई यांच्या हत्येनंतर वरिष्ठ धर्मगुरू अयातुल्लाह अलिरेझा अराफी यांची इराणचे नवे हंगामी सर्वोच्च नेते म्हणून नियुक्ती करण्यात आली आहे. इराणच्या राज्य वृत्तसंस्थेने हे वृत्त दिले आहे. अयातुल्लाह अलिरेझा अराफी यांची अंतरिम नेतृत्व परिषदेचे कायदेतज्ञ सदस्य म्हणून नियुक्ती करण्यात आली आहे. इराणच्या संविधानानुसार, नवीन नेता निवडला जाईपर्यंत संक्रमण काळात ही परिषद सर्वोच्च नेत्याची सर्व कर्तव्ये सांभाळेल.

इराणच्या संविधानानुसार, अंतरिम परिषदेत अध्यक्ष मसूद पेझेश्कियान, सरन्यायाधीश गुलाम-होसेन मोहसेनी-एजेई आणि पालक परिषदेतील एक धर्मगुरू यांचा समावेश आहे. खामेनेई यांच्या निधनानंतर, इराण संक्रमण काळात प्रवेश करत असताना ही परिषद संयुक्तपणे देशाची जबाबदारी हाताळत असते.

1989 पासून इराणवर राज्य करणारे 86 वर्षीय खामेनेई शनिवारी अमेरिका-इस्रायली लष्करी हल्ल्यात ठार झाले. या कारवाईत लष्करी तळ, सरकारी ठिकाणे आणि वरिष्ठ नेतृत्वाच्या ठिकाणांना लक्ष्य करण्यात आले, ज्यात संरक्षण मंत्री अमीर नासरजादेह आणि कमांडर-इन-चीफ मोहम्मद पाकपोर यांच्याशी संबंधित ठिकाणांचा समावेश होता.