अॅपलची भारतात विक्रमी विक्री

आयफोन, मॅक, आयपॅडसह अन्य सेवांमध्ये प्रचंड वाढ

वृत्तसंस्था/ नवी दिल्ली

जगातील दिग्गज टेक जायंट अॅपल यांनी भारतीय बाजारात चमकदार कामगिरी केली आहे. अॅपलचे सीईओ टीम कुक म्हणाले की, ऑक्टोबर-डिसेंबर 2025 च्या तिमाहीत भारतात अॅपलची कामगिरी उत्कृष्ट होती आणि या काळात कंपनीने विक्रमी तिमाही विक्री नोंदवली. आयफोन, मॅक, आयपॅड आणि सेवा या सर्वांनी आतापर्यंतची सर्वाधिक तिमाही विक्री नोंदवली. सध्याला भारत अॅपलसाठी एक मोठी वाढणारी बाजारपेठ बनली आहे.

अॅपलचा विक्रीत दुहेरी आकडा : सीईओ कुक

भारतासारख्या उदयोन्मुख बाजारपेठांमध्ये अॅपलची विक्री दुहेरी अंकात वाढत आहे. कंपनीने अलीकडेच भारतात त्यांचे पाचवे अॅपल स्टोअर उघडले आहे आणि लवकरच मुंबईत आणखी एक नवीन स्टोअर उघडण्याची योजना आखत आहे, असे अॅपलचे सीईओ टीम कुक यांनी स्पष्ट केले आहे.

अॅपलच्या पहिल्या तिमाहीच्या जागतिक कमाई कॉल दरम्यान टीम कुक म्हणाले की, आम्हाला भारतात जे दिसत आहे ते आम्हाला आवडते. भारत जगातील दुसरा सर्वात मोठा स्मार्टफोन बाजार आणि चौथा सर्वात मोठा पीसी बाजार आहे. असे असूनही, येथे आमचा वाटा अजूनही कमी आहे, म्हणून येथे आमच्यासाठी खूप क्षमता आहे. मार्केट रिसर्च कंपनी काउंटरपॉइंट रिसर्चच्या मते, 2025 मध्ये, अॅपल भारतात व्हॉल्यूमच्याबाबतीत 9 टक्के आणि किमतीच्याबाबतीत 28 टक्के इतकी सर्वाधिक हिस्सेदारी गाठणार असल्याचे स्पष्ट केले आहे. यासोबतच, आयफोन 16 हा भारतात सर्वाधिक पाठवला जाणारा मॉडेल राहिला आहे.

भारतात अॅपल वापरकर्त्यांची संख्या वाढती

अॅपलचे सीएफओ केवन पारेख म्हणाले की, भारतात अॅपल डिव्हाइस वापरणाऱ्या वापरकर्त्यांच्या संख्येतही दुहेरी अंकी वाढ झाली आहे. आयफोनचा सक्रिय वापरकर्ता बेस विक्रमी पातळीवर पोहोचला आहे. भारतासह अमेरिका, चीन, जपानसारख्या अनेक देशांमध्ये अपग्रेड केलेल्या वापरकर्त्यांची संख्या देखील सर्वाधिक होती. अॅपलने अमेरिका, युरोप, चीन, भारत आणि दक्षिण आशियासह त्यांच्या बहुतेक प्रमुख बाजारपेठांमध्ये वर्षाच्या आधारे दुहेरी अंकी वाढ नोंदवली आहे. जागतिक आयफोन महसूल 85.3 अब्ज डॉलर होता आणि मॅक महसूल 8.4 अब्ज डॉलर होता. मॅक विक्रीत घट होत असली तरी, भारत, ब्राझील, मलेशिया आणि व्हिएतनामसारख्या उदयोन्मुख बाजारपेठांमध्ये वाढ दिसून आली.