ग्रीनलँडमध्ये ट्रम्पविरोधी निदर्शने

देशावर कब्जा करण्याच्या वक्तव्याचा निषेध : अमेरिकेकडून  युरोपियन युनियनलाही करवाढीची धमकी

वृत्तसंस्था/ नुक

अमेरिकेचे राष्ट्राध्यक्ष डोनाल्ड ट्रम्प यांनी ग्रीनलँडवर ताबा घेण्याबाबत केलेल्या विधानांचा निषेध करण्यासाठी गेल्या दोन दिवसांपासून हजारो ग्रीनलँडवासीय नागरिक रस्त्यावर उतरले आहेत. निदर्शकांनी ‘ग्रीनलँड विक्रीसाठी नाही’ अशा घोषणा देत आपल्या स्वराज्याच्या समर्थनार्थ मोर्चा काढला.

ग्रीनलँडच्या विलयीकरणाबाबत अमेरिकेचे राष्ट्राध्यक्ष ट्रम्प यांच्या विधानांवर लोकांनी संताप व्यक्त केला. निदर्शकांनी बर्फ आणि हिमवर्षावाने आच्छादलेल्या रस्त्यांवर ग्रीनलँडची राजधानी नुक येथून अमेरिकन वाणिज्य दूतावासापर्यंत मोर्चा काढला. त्यांनी राष्ट्रीय ध्वज फडकावत निषेधाचे पोस्टर हातात घेतले होते. पोलिसांच्या मते, हे आतापर्यंतचे सर्वात मोठे निदर्शन असल्याचे मानले जाते. या आंदोलनामध्ये राजधानीतील जवळजवळ एक चतुर्थांश लोक सहभागी झाले होते. निदर्शनादरम्यान अमेरिकेने फेब्रुवारीपासून आठ युरोपीय देशांमधून आयात केलेल्या वस्तूंवर 10 टक्के कर लावण्याची घोषणा केल्याची बातमी आली. या निर्णयाला ग्रीनलँडवरील अमेरिकेच्या नियंत्रणाला त्या देशांच्या विरोधाशी जोडले जात आहे.

या धमकीमुळे ट्रम्पविरुद्ध ग्रीनलँडचा रोष आणखी वाढला आहे. दरम्यान, युरोपियन युनियनने अमेरिकेसोबतच्या व्यापार कराराची मंजुरी रोखण्याची तयारी केली आहे. युरोपियन पीपल्स पार्टीचे अध्यक्ष मॅनफ्रेड वेबर यांनी शनिवारी सोशल मीडियावर ट्रम्प यांनी ग्रीनलँडला दिलेल्या धमक्यांमुळे अमेरिकेसोबतच्या कराराची मान्यता अशक्य असल्याचे म्हटले आहे.