पंतप्रधान नरेंद्र मोदींच्या 25 वर्षांच्या कारकिर्दीने देशाचा कायापालट; केंद्रीय गृहमंत्री अमित शाहांचा दावा
मुंबई : 2014 पूर्वी देश भ्रष्टाचार, जातीवाद आणि परिवारवादाने ग्रासलेला होता. मात्र, पंतप्रधान नरेंद्र मोदी यांच्या नेतृत्वाखालील शासनकाळात या नकारात्मक प्रवृत्तींना आळा बसला असून भारत आज विकसित राष्ट्राच्या दिशेने वेगाने वाटचाल करत आहे, असा दावा केंद्रीय गृहमंत्री अमित शाह यांनी केला.
नरेंद्र मोदी यांनी गुजरातचे मुख्यमंत्री आणि त्यानंतर देशाचे पंतप्रधान म्हणून 25 वर्षांची कारकीर्द पूर्ण केली आहे. या कालावधीत त्यांनी देशाच्या विकासाला नवी दिशा दिल्याचे अमित शाह यांनी नमूद केले.
आज भारताची अर्थव्यवस्था जगातील सर्वाधिक वेगाने वाढणाऱ्या अर्थव्यवस्थांपैकी एक म्हणून ओळखली जात असून, भारत विकसित देशांच्या दिशेने वाटचाल करत असल्याचेही शाह यांनी सांगितले. या परिवर्तनाचे श्रेय पंतप्रधान नरेंद्र मोदी यांच्या नेतृत्वाला असल्याचे त्यांनी स्पष्ट केले.
पंतप्रधान मोदी यांच्या कार्यशैलीचा उल्लेख करताना अमित शाह यांनी समर्थ रामदास स्वामी यांच्या ‘उपभोग शून्य स्वामी’ या संकल्पनेचाही दाखला दिला. स्वतःपेक्षा देशहिताला प्राधान्य देत मोदी यांनी काम केले असल्याचे शाह यांनी सांगितले.