अकुताई, भाग्यश्री, प्रतिमाला सुवर्ण

  पंढरपूरच्या अकुताईची गोळाफेकमध्ये कमाल : महाराष्ट्राचा महिला शक्तीचा सुवर्ण पराक्रम

वृत्तसंस्था/   नवी दिल्ली 

महाराष्ट्राच्या महिलाशक्ती जयजयकार सलग दुसऱ्या खेलो इंडिया पॅरा गेम्समध्येही दुमदुमला. अॅथलेटिक्समध्ये अकुताई उनभगत, भाग्यश्री जाधव तर पॉवरलिफ्टिंगमध्ये प्रतिमा भोंडे यांनी यंदा सुवर्णपदकासह स्पर्धेत सलग दुसऱ्यांदा पदक जिंकण्याचा पराक्रम नोंदविला आहे.

जवाहरलाल नेहरू स्टेडियममध्ये संपलेल्या अॅथलेटिक्स स्पर्धेत 38 वर्षीय अकुताई हिने गोळाफेकमधील एफ 40 प्रकारात सुवर्णपदक जिंकले. तिने 5.79 मीटर अंतरावर गोळा फेकला. याच प्रकारात महाराष्ट्राच्या रूही शिंगाडेने 4.43 मीटर फेकी करून कांस्यपदकाची कमाई केली. स्पर्धेतील अकुताईचे हे दुसरे सुवर्ण ठरले. यापूर्वी तिने थाळीफेकमध्ये 15.83 मीटर कामगिरीसह सुवर्ण जिंकले होते. गत खेलो इंडिया पॅरा गेम्समध्येदेखील तिने याच दोन्ही प्रकारात सुवर्ण जिंकले होते.मूळ पंढरपूरजवळील शेवते गावची रहिवासी असलेली अकुताई सध्या पुण्यातील आझम कॅम्पस येथे पॅरालिम्पिक पदकविजेता खेळाडू सचिन खिलारी याच्या मार्गदर्शनाखाली सराव करते. सर्वसामान्य कुटुंबातून आलेल्या अकुताईचे आई-वडील शेती करतात.

पॅरालिम्पिक खेळाडू असलेल्या भाग्यश्री जाधव हिनेदेखील गत खेलो इंडिया पॅरा गेम्सप्रमाणे यावेळीही दोन सुवर्णपदके पटकावली. तिने यावेळीही भालाफेक आणि गोळाफेक प्रकारात अव्वल स्थान प्राप्त केले. भाग्यश्रीने गोळाफेकीत 7.30 मीटर अंतरावर गोळा फेकत दुसरे सुवर्ण पदक पटकावले. भाग्यश्री ही मूळची नांदेड जिह्यातील घोडवडज गावची. 18 वर्षांची असताना ती कोमात गेली. त्यात तिच्या पायाखालील शरीर अधू झाले. सध्या ती पुण्यातील शिवाजीनगर येथील पोलीस मुख्यालयाच्या मैदानावर रविंदर यांच्या मार्गदर्शनाखाली सराव करते.

नागपूरच्या प्रतिमाला सुवर्ण

पॉवरलिफ्टिंगमध्ये महिलांच्या 50 किलो गटात नागपूरच्या प्रतिमा भोंडे सोनेरी यशाचे वजन पेलले. 33 वर्षीय प्रतिमाने 86 किलो वजन उचलून महाराष्ट्राची शान उंचावली. तामिळनाडूच्या गोमाथीने 65 किलो वजन उचलून रौप्य पदकाची कमाई केली. गोमाथीपेक्षा तब्बल 11 किलो अधिक वजनाची सरस कामगिरी करीत प्रतिमाने केली. गतस्पर्धेत प्रतिमाला रौप्य पदकावर समाधान मानावे लागले. द्रोणाचार्य पुरस्कार प्राप्त विजय मुनेश्वर यांच्याकडे गेली वर्ष ती सराव करीत आहे.

भाग्यश्रीचा असाही सुवर्ण षटकार!

37 वर्षीय भाग्यश्रीने दिल्लीतील जवाहरलाल नेहरू स्टेडियममध्ये सुवर्णपदकांचा षटकार झळकविला आहे. सलग दोन खेलो इंडिया पॅरा गेम्समध्ये प्रत्येकी दोन सुवर्ण तसेच पॅरा ग्रांप्रीमध्ये दोन सुवर्ण तिने या स्टेडियममध्येच जिंकली आहेत.