Kolhapur News : अक्कलकोट स्वामी समर्थ पालखीने कुंभोज परिसर भक्तिरसात न्हालला

                               “जय जय स्वामी समर्थ” घोषणांनी कुंभोज दुमदुमले

कुंभोज (ता. हातकणंगले) येथे अक्कलकोट निवासी श्री स्वामी समर्थांच्या पवित्र पादुका व पालखीचे आगमन होताच परिसर भक्तिमय वातावरणाने भारावून गेला. सकाळपासूनच राहुल घोरपडे यांचा निवास स्थानी स्वामी समर्थ महाराजांची पालखी विराजमान झाली होती या ठिकाणी भाविकांची मोठी गर्दी जमली होती.

ढोल-ताशांच्या गजरात, फुलांची उधळण व “जय जय स्वामी समर्थ” या घोषणांमध्ये पादुका व पालखीचे जल्लोषात स्वागत करण्यात आले.यावेळी कुंभोज व परिसरातील अनेक भाविकांनी पारंपरिक वेशभूषेत सहभाग घेतला. महिलांनी औक्षण करून पादुकांचे दर्शन घेतले, तर अनेक भक्तांनी नारळ, फुले व प्रसाद अर्पण करून स्वामींचा आशीर्वाद घेतला. पालखी मार्गावर ठिकठिकाणी रांगोळ्या काढण्यात आल्या होत्या.

या कार्यक्रमाचे आयोजन स्वामी भक्त मंडळाच्या वतीने करण्यात आले होते. कार्यक्रम शांततामय व भक्तिभावाच्या वातावरणात पार पडला. स्वामी समर्थांच्या पादुका व पालखीच्या दर्शनाने भाविकांमध्ये आध्यात्मिक ऊर्जा संचारल्याचे दिसून आले.