आकाशदीप, प्रियांका पॅरिस ऑलिंपिकसाठी पात्र
वृत्तसंस्था/ अँटेलिया (तुर्की)
येथे सुरू असलेल्या विश्व अॅथलेटिक्स रेस चालण्याच्या सांघिक चॅम्पियनशिप स्पर्धेत मिश्र सांघिक रिले प्रकारात भारताच्या आकाशदीपसिंग आणि प्रियांका गोस्वामी यांनी 18 वे स्थान मिळवून पॅरिस ऑलिंपिकचे तिकीट निश्चित केले. पॅरिस ऑलिंपिक स्पर्धेसाठी तुर्कीतील या स्पर्धेत आघाडीचे 22 संघ थेट पात्र ठरले असल्याने त्यामध्ये भारताचा समावेश झाला आहे. मिश्र सांघिक रिले प्रकारात आकाशदीप आणि प्रियांका गोस्वामी यांनी 42.195 कि. मी. अंतर तीन तास, 05 मिनिटे आणि 03 सेकंदात पार केले. आकाशदीप आणि प्रियांका यांची ही या क्रीडाप्रकारातील सर्वोत्तम वैयक्तिक कामगिरी आहे.
मिश्र सांघिक रिले चालण्याच्या प्रकारामध्ये पुरूष आणि महिला स्पर्धकाचा समावेश असून पहिल्यांदा पुरूष स्पर्धकाला 12.195 कि. मी.चा टप्पा तर त्यानंतर महिला स्पर्धकांना 10 कि. मी.चा टप्पा चालत पार करावा लागतो. त्यानंतर पुरूष आणि महिला स्पर्धकाला प्रत्येकी पुन्हा 10 कि. मी.चे अंतर चालत पार करावे लागते. या क्रीडाप्रकारात इटलीच्या संघाने सुवर्णपदक मिळविताना दोन तास 56 मिनिटे आणि 45 सेकंदाचा अवधी घेतला. जपानने रौप्यपदक तर स्पेनने कास्यपदक मिळविले.