एअरटेल 65 कोटी ग्राहक संख्येसह जगात दुसऱ्या स्थानी

भारत आणि आफ्रिकेत मजबूत पकड : 5 जीसह डिजिटल सेवांवर मोठी बाजी

वृत्तसंस्था, नवी दिल्ली

देशातील दुसरी सर्वात मोठी दूरसंचार कंपनी, भारती एअरटेलने आपल्या जागतिक बाजारपेठांमध्ये 65 कोटी ग्राहकांचा महत्त्वाचा जादुई टप्पा ओलांडला आहे. यासह, कंपनीने जगभरातील ग्राहकांच्या संख्येनुसार दुसरे स्थान प्राप्त केले आहे. सुनील मित्तल यांच्या मालकीच्या कंपनीने सांगितले की, जीएसएमए इंटेलिजन्सच्या मते, मोबाईल ग्राहकांच्या संख्येनुसार भारती एअरटेल जागतिक स्तरावर दुसऱ्या क्रमांकावर आहे.

एअरटेलने अलीकडेच एनबीएफसी (नॉन-बँकिंग फायनान्शियल कंपनी) क्षेत्रात प्रवेश करण्याची घोषणा केली असून, आपल्या डिजिटल सेवांचा आणखी विस्तार केला आहे. यामध्ये, एअरटेल अॅपद्वारे वैयक्तिकृत क्रेडिट आणि आर्थिक योजना देण्यासाठी कंपनी आपल्या डेटाचा वापर करणार आहे.

आफ्रिकेतही मजबूत व्यवसाय

आफ्रिकेतील आपल्या कामकाजात 14 देशांमध्ये कंपनीचे 17.9 दशलक्षाहून अधिक ग्राहक आहेत. एअरटेल आफ्रिकेचा प्रमुख विभाग एअरटेल मनी आहे, जे 5.2 दशलक्षाहून अधिक ग्राहक असलेले एक क्रांतिकारी मोबाईल वित्तीय व्यासपीठ आहे. या दूरसंचार कंपनीने वनवेब-यूटेलसॅटसोबत भागीदारी करून उपग्रह दळणवळण क्षेत्रात प्रवेश केला आहे, जी जागतिक बाजारपेठांना आपल्या सेवा पुरवते. लवकरच भारतातही कामकाज सुरू होण्याची शक्यता आहे.

आमच्यावर मोठी जबाबदारी : गोपाल विट्टल

कंपनीचे कामकाज आता भारत आणि आफ्रिकेपर्यंत विस्तारले आहे.या कामगिरीवर भाष्य करताना, भारती एअरटेलचे कार्यकारी उपाध्यक्ष, गोपाल विट्टल म्हणाले, ‘65 कोटी ग्राहकांचा हा टप्पा गाठणे आणि जगातील दुसरी सर्वात मोठी ऑपरेटर बनणे ही आमच्यावर एक मोठी जबाबदारी आहे, जेणेकरून आम्ही आमच्या ग्राहकांना दररोज आणखी चांगली सेवा देऊ शकू. म्हणूनच आम्ही केवळ कनेक्टिव्हिटीच नव्हे, तर सुरक्षित नेटवर्क देण्यासाठीही अत्याधुनिक तंत्रज्ञानामध्ये गुंतवणूक करत आहोत.“