एअर मार्शल अमर प्रीत सिंग हवाई दलाचे नवे प्रमुख

30 सप्टेंबरपासून पदभार स्वीकारणार

वृत्तसंस्था/ नवी दिल्ली

एअर मार्शल अमर प्रीत सिंग हे भारतीय हवाई दलाचे नवे प्रमुख असतील. ते 30 सप्टेंबर रोजी पदभार स्वीकारतील. ते एअर मार्शल विवेक राम चौधरी यांची जागा घेतील. अमर प्रीत सिंग आतापर्यंत हवाई दलाच्या उपप्रमुख पदावर कार्यरत होते. त्यांना रोटरी विंग एअरक्राफ्टवर 5 हजार तासांहून अधिक उ•ाणाचा अनुभव आहे. उपप्रमुख होण्यापूर्वी त्यांनी ऑपरेशनल फायटर स्क्वॉड्रन्स आणि फ्रंटलाइन एअर बेसचे नेतृत्वही केले आहे.

अमर प्रीत सिंग यांनी वयाच्या 59 व्या वषी तेजस विमान चालवले होते. सर्वोत्कृष्ट कार्य व सेवेबद्दल त्यांना विविध पुरस्कारांनीही सन्मानित करण्यात आले आहे. 2019 मध्ये त्यांना ‘विशिष्ठ सेवा पदक’ तर 2023 मध्ये ‘परम विशिष्ट सेवा पदक’ प्रदान करण्यात आले होते.

एअर मार्शल अमर प्रीत सिंग यांचा जन्म 27 ऑक्टोबर 1964 रोजी झाला. 1 फेब्रुवारी 2023 रोजी त्यांची हवाई दलाचे 47वे उपप्रमुख म्हणून नियुक्ती करण्यात आली. त्यांनी 1984 मध्ये हवाई दलात आपल्या कारकिर्दीला सुऊवात केली. ते 21 डिसेंबर 1984 रोजी एअर फोर्स अकादमी डुंडीगल येथून भारतीय हवाई दलात नियुक्त झाले. त्यांनी इस्टर्न एअर कमांडमध्ये वरिष्ठ हवाई अधिकारी म्हणून काम केल्यानंतर त्यांनी सेंट्रल एअर कमांडचेही नेतृत्व केले.

नॅशनल फ्लाईट टेस्ट सेंटरमध्ये अमर प्रीत सिंग प्रोजेक्ट डायरेक्टरही होते. त्यांच्याकडे तेजस लढाऊ विमानाच्या उ•ाण चाचणीची जबाबदारी सोपवण्यात आली होती. त्यांनी नॅशनल डिफेन्स अकादमी खडकवासला आणि एअर फोर्स अकादमी डुंडीगल येथून प्रशिक्षण घेतले. ते डिफेन्स सर्व्हिसेस स्टाफ कॉलेज, वेलिंग्टनचे माजी विद्यार्थी आहेत.