एआयपी गुंतवणूक प्रथमच 31,000 कोटींच्या पुढे

वृत्तसंस्था/ नवी दिल्ली

सध्या म्युच्युअल फंडांमध्ये सिस्टिमॅटिक इन्व्हेस्टमेंट प्लॅन (एसआयपी) द्वारे वेगाने गुंतवणूक सुरू आहे. डिसेंबर 2025 मध्ये एसआयपीने एक नवीन विक्रम रचला आणि प्रथमच गुंतवणुकीने 31,000 कोटी रुपयांचा टप्पा ओलांडला. दरम्यान, नोव्हेंबरच्या तुलनेत इक्विटी म्युच्युअल फंडांमधील गुंतवणूक 6 टक्क्यांनी घसरून 28,054 कोटी रुपयांवर आली.

इक्विटी फंडांमध्ये फ्लेक्सी कॅप फंडांची कामगिरी दमदार राहिली आहे. गेल्या महिन्यात या श्रेणीत 10 हजार कोटींहून अधिक रुपयांची प्रचंड गुंतवणूक झाली. तज्ञांचे मत आहे की गुंतवणूकदारांना भारताच्या विकासाच्या गाथेवर आणि बाजाराच्या दीर्घकालीन दृष्टिकोनावर विश्वास आहे.

असोसिएशन ऑफ म्युच्युअल फंड्स इन इंडिया (एएमएफआय) ने जारी केलेल्या आकडेवारीनुसार, डिसेंबर महिन्यात गुंतवणूकदारांनी इक्विटी म्युच्युअल फंडांमध्ये 28,054 कोटी रुपये गुंतवले. तथापि, ही रक्कम नोव्हेंबरमधील 29,911 कोटी रुपयांपेक्षा सुमारे 6 टक्के कमी आहे. असे असूनही, गुंतवणूक ऑक्टोबरच्या पातळीपेक्षा (24,690 कोटी रुपये) जास्त राहिली.

ओम्निस सायन्स कॅपिटलचे सीईओ आणि मुख्य गुंतवणूक रणनीतिकार डॉ. विकास गुप्ता यांच्या मते, म्युच्युअल फंड उद्योगात पैशांचा ओघ सुरूच आहे, जे दर्शवते की गुंतवणूकदारांना भारताच्या अर्थव्यवस्था आणि शेअर बाजाराच्या दीर्घकालीन संभाव्यतेवर विश्वास आहे. ते म्हणाले की, गेल्या एका वर्षातील शेअर बाजारातील चढ-उतार आणि सोने-चांदीतील उत्कृष्ट परताव्यामुळे मल्टी-सेट फंडांमधील गुंतवणूक वेगाने वाढली आहे. तथापि, त्यांनी असा इशाराही दिला की, सध्या सोने आणि चांदीमध्ये जास्त गुंतवणूक करणे टाळावे, कारण त्यात आधीच बरीच वाढ झाली आहे.

अॅबॅकस म्युच्युअल फंडाचे सीईओ वैभव चुघ म्हणतात, ‘भारतीय अर्थव्यवस्थेचे बहुतेक मजबूत पैलू योग्य दिशेने आहेत आणि गेल्या दीड वर्षात बाजारात कालांतराने सुधारणा झाली आहे.’ भू-राजकारण आणि शुल्कासारख्या मुद्यांवर पुढे काय होईल हे कोणीही सांगू शकत नसल्यामुळे टप्प्याटप्प्याने गुंतवणूक करणे योग्य होय.

फंड श्रेणी                        डिसेंबर 2025          नोव्हेंबर 2025

मल्टीकॅप फंड                 2,2 54.95                2,462.84

लार्ज कॅप फंड               1,567.42                 1,639.80

लार्ज अँड मिड कॅप         4,093.51                 4,503.31

मिड कॅप फंड               4,175.81                 4,486.91

स्मॉल कॅप फंड              3,823.82                 4,406.90

डिव्हिडंड यील्ड फंड       -254.32                 -277.74

व्हॅल्यू फंड/कॉन्ट्रा फंड    1,088.51                 1,219.44

फोकस्ड फंड           1,056.82                     2,039.73

सेक्टोरल/थिमॅटिक फंड  945.99                     1,864.99

ईएलएसएस                -717.73                      570.17

फ्लेक्सी कॅप फंड             10,019.2                  8,135.01

(कोटी रुपयांमध्ये)                                           (स्रोत: अॅम्फी)