विधासभा निवडणुकीत भाजप-काँग्रेसला पर्याय देण्यासाठी ‘आप’ आणि गोवा फॉरवर्डची आघाडी; ‘गोवा फर्स्ट’ची घोषणा

पणजी : गोव्याच्या 2027 विधानसभा निवडणुकीच्या पार्श्वभूमीवर आम आदमी पक्ष (AAP) आणि गोवा फॉरवर्ड पार्टी (GFP) यांनी रविवारी निवडणूकपूर्व आघाडीची घोषणा केली. या नव्या आघाडीला ‘गोवा फर्स्ट’ असे नाव देण्यात आले आहे. आगामी विधानसभा निवडणूक दोन्ही पक्ष एकत्रितपणे लढणार आहेत.

आम आदमी पक्षाचे राष्ट्रीय संयोजक अरविंद केजरीवाल आणि गोवा फॉरवर्डचे अध्यक्ष विजय सरदेसाई यांनी पत्रकार परिषदेत आघाडीची घोषणा केली. या आघाडीमुळे गोमंतकीयांना ‘भाजपविरोधी आणि काँग्रेसविरोधी’ पर्याय उपलब्ध होईल, असा दावा केजरीवाल यांनी केला.

केजरीवाल शनिवारी गोव्यात दाखल झाले होते. गोव्यात येऊन आपण ‘मोठी घोषणा’ करणार असल्याचे त्यांनी यापूर्वी सांगितले होते. त्यांच्या दौऱ्यापूर्वी राज्यातील विविध भागांत AAP आणि GFP च्या चिन्हांसह आघाडीचे संकेत देणारे पोस्टर्सही झळकले होते.

काँग्रेससोबतच्या चर्चांना ब्रेक

गोवा फॉरवर्डच्या राज्य कार्यकारिणीची शनिवारी बैठक झाली. यावेळी भाजपचा संयुक्तपणे सामना करण्यासाठी समान विचारांच्या धर्मनिरपेक्ष राजकीय शक्तींशी आघाडी करण्याच्या दिशेने पुढे जाण्याचा निर्णय घेण्यात आला.

दरम्यान, काँग्रेस आणि गोवा फॉरवर्ड यांच्यातही संभाव्य निवडणूकपूर्व आघाडीबाबत चर्चा सुरू होती. मात्र, या चर्चांना अपेक्षित गती मिळाली नसल्याचे आता स्पष्ट झाले आहे. व्यापक विरोधी आघाडी उभारण्यास काँग्रेसकडून विलंब होत असल्याचा आरोप आप आणि गोवा फॉरवर्डच्या नेत्यांनी केला आहे.

इतर समान विचारांच्या धर्मनिरपेक्ष पक्षांसाठी आघाडीचे दरवाजे खुले ठेवण्यात येणार असल्याचेही सांगण्यात आले. मात्र, निवडणुकीच्या काही महिने आधी आघाडीची तयारी सुरू करणे योग्य ठरणार नाही, अशी भूमिका दोन्ही पक्षांनी घेतली आहे.

दक्षिण गोव्यात दोन्ही पक्षांचे बळ

‘गोवा फर्स्ट’ आघाडीत सध्या गोवा फॉरवर्डकडे 1 आमदार, तर आम आदमी पक्षाकडे 2 आमदार आहेत. AAP चे बेनॉलीमचे वेन्झी व्हिएगस आणि वेळ्ळीचे क्रुझ सिल्वा हे दोन्ही आमदार दक्षिण गोव्यातील मतदारसंघांचे प्रतिनिधित्व करतात. गोवा फॉरवर्डचे अध्यक्ष विजय सरदेसाई हे फातोर्डाचे आमदार आहेत.

2022 च्या विधानसभा निवडणुकीत 40 सदस्यांच्या सभागृहात भाजपला 20 जागा मिळाल्या होत्या, तर काँग्रेसने 11 जागा जिंकल्या. त्यानंतर काँग्रेसच्या 8 आमदारांनी भाजपमध्ये प्रवेश केल्याने काँग्रेसची संख्या 3 वर आली. यापूर्वी 2019 मध्येही काँग्रेसच्या 10 आमदारांनी भाजपमध्ये प्रवेश केला होता.

2022 मध्ये आम आदमी पक्षाने स्वतंत्रपणे निवडणूक लढवत 2 जागा जिंकल्या, तर काँग्रेससोबत आघाडी करून लढलेल्या गोवा फॉरवर्डने फातोर्डा मतदारसंघ राखला.

आता 2027 च्या निवडणुकीसाठी ‘गोवा फर्स्ट’च्या माध्यमातून भाजप आणि काँग्रेसला पर्याय देण्याचे आव्हान दोन्ही पक्षांसमोर असणार आहे.