चौकुळ येथे अंगावर वीज कोसळून महिला जागीच ठार

आंबोली वार्ताहर
सावंतवाडी तालुक्यातील चौकुळ चिखलव्हाळ ,बेरडकी येथे गुरे चारण्यास गेलेल्या द्रौपदी मारुती नाईक, (वय 35) या महिलेवर गडगडाटासह आलेल्या परतीच्या पावसात वीज कोसळून तिचा जागीच मृत्यू झाला. ही घटना सोमवार दिनांक 14 ऑक्टोबर रोजी सायंकाळी चार वाजण्याच्या सुमारास घडली. चार दिवसांपूर्वी येथूनच काही अंतरावर आड्याष्टा येथे पाण्यात वीज पडून एक दुभती म्हैस व एक रेडा जागीच जळून ठार झाला होता. ही घटना ताजी असतानाच सोमवारी अचानक विजेच्या गडगडाटासह या परिसरात पाऊस कोसळत असताना या महिलेवर वीज पडून तिचा दुर्दैवी अंत झाला. दरम्यान सदर महिला मोलमजुरी करून उदरनिर्वाह करीत असे. याबाबतची माहिती चौकुळ माजी सरपंच बाबू शेटवे यांनी चौकुळ तलाठी यांना दिली आहे. द्रौपदी यांच्या पश्चात पती आणि दोन मुले आहेत. घडलेल्या घटनेने चौकुळ गावावर शोककळा पसरली आहे.