दापोलीच्या सुपुत्राने जिंकली रशियामध्ये हॅकेथॉन

दापोली / मनोज पवार :

रशियातील एकातेरिनबर्ग येथील उरल फेडरल युनिव्हर्सिटीद्वारे आयोजित आंतरराष्ट्रीय हॅकेथॉनची दापोली तालुक्यातील आंजर्लेमधील पार्थ तोडणकर आणि त्याची टीम विजेती ठरली आहे. यामुळे पुन्हा आंतरराष्ट्रीय पातळीवर दापोलीच्या टॅलेंटची चर्चा होत आहे.

२२ हून अधिक देशांनी सहभाग घेतलेल्या या तीव्र स्पर्धात्मक कार्यक्रमात पार्थ व त्याच्या टीमने नावीन्यपूर्णता, समस्या सोडवणे व तंत्रज्ञानावर आधारित विचारसरणीमध्ये तेजस्वी कामगिरी करत भारताचे प्रतिनिधीत्व केले. जगभरातील प्रतिभांमध्ये उभे राहून त्याचा विजय केवळ त्याच्यासाठीच नाही तर संपूर्ण भारतीय तंत्रज्ञान समुदायासाठी एक तेजस्वी क्षण आहे, अशी प्रतिक्रिया पार्थच्या पालकांनी दिली. पार्थचे यश हे उत्कटतेने उद्देश पूर्ण झाल्यावर काय घडते, याचा पुरावा आहे व स्थानिक मुळांद्वारे जागतिक प्रभावावर विश्वास ठेवणाऱ्या प्रत्येक भारतीयांसाठी हा अभिमानाचा क्षण आहे. सीमांच्या पलिकडे पोहोचणाऱ्या भारतीय उत्कृष्टतेची ही कहाणी साजरी करूया आणि शेअर करूया, अशी प्रतिक्रियाही त्यांनी दिली.

पार्थ सध्या नवी मुंबईतील डी. वाय. पार्थ तोडणकर पाटील विद्यापीठात बी. टेकच्या चौथ्या वर्षात आहे. त्याचे वडील आयटी उद्योगात काम करत असल्याने अशा कुटुंबातून आलेला पार्थ नेहमीच तंत्रज्ञान व नाविन्यपूर्णतेबद्दल खोलवरचा उत्साह दाखवत आहे. त्याची हुशारी पाहून रामराव आदिक इन्स्टिट्यूट ऑफ टेक्नॉलॉजीने त्याची रशियामधील उन्हाळी इंटर्नशिप कार्यक्रमासाठी निवड केली. ज्यामुळे त्याच्या आंतरराष्ट्रीय प्रदर्शनाचा व वाढीचा मार्ग मोकळा झाला.

हॅकेथॉन ही एक कालबद्ध स्पर्धात्मक स्पर्धा आहे. जिथे प्रोग्रामर, डेव्हलपर्स व तंत्रज्ञानप्रेमी एकत्र येऊन नावीन्यपूर्णता आणि कोडिंगद्वारे वास्तविक जगातील समस्या सोडवतात. गेल्या काही वर्षांत पार्थने भारतभर असंख्य हॅकथॉनमध्ये भाग घेतला आहे. सतत त्याने त्याचे कौशल्य शिकत व विकसित करत आहे. जावा, पायथॉन, meer आणि मोंगोडीबीसारख्या प्रोग्रामिंग भाषांमध्ये प्रभूत्व मिळवण्याच्या त्याच्या समर्पणाने त्याला जागतिक स्तरावर स्पर्धा करण्यास व जिंकण्यास सज्ज केले आहे. या स्पर्धेमध्ये २२ देशांतील हुशार विद्यार्थ्यांचा सहभाग होता. त्यामध्ये बेस्ट स्टुडन्टचा मानही पार्थने पटकावला.

हे सर्व करतानाच मानसिक आरोग्यासाठी फिशिंग, गाणे, गिटार यासारखे छंदही पार्थ जोपासतो. पार्थ व कुटुंबीय गावच्या सर्व सण-समारंभांसाठी आवर्जून सहभागी असतात. ज्या वृक्षाची मुळे खोलवर घट्ट रुजलेली असतात, तोच निरोगी वाढून विस्तार चांगला करू शकतो. यावर परिवाराचा ठाम विश्वास असल्याने गावची नाळ त्यांनी जपली आहे. मुलात गावची ओढ निर्माण होईल, यासाठी जाणीवपूर्वक प्रयत्न केले. हे फक्त पार्वचे यश नाही. तर त्याचे पालक उमेश व उन्नती तोडणकरांसाठी, आंजर्लेसाठी आणि भारतातील प्रत्येक तरुण नवोन्मेषकासाठी हा अभिमानाचा क्षण असल्याची भावना दापोली तालुक्यात व्यक्त करण्यात येत आहे.

• हॅकेथॉन म्हणजे काय?

हॅकथॉन म्हणजे विशिष्ट विषयावर किंवा समस्येवर उपाय शोधण्यासाठी, विविध पार्श्वभूमीतील लोक एकत्र येऊन कमी वेळेत २४ ते ७२ तास काम करतात, असा एक कार्यक्रम आहे. यात प्रामुख्याने प्रोग्रामर, डिझायनर, उद्योजक व इतर तंत्रज्ञानप्रेमी लोक भाग घेतात. हॅक आणि मॅरेथॉन या शब्दांवरून 'हॅकेथॉन' हा शब्द तयार झाला आहे, ज्याचा अर्थ आहे, कमी वेळेत समस्या सोडवण्यासाठी एकत्रितपणे काम करणे.