Mahakaal Temple Reel Controversy प्रसिद्ध महाकाल मंदिरात साखरपुडा? रील व्हायरल होताच सुरक्षा यंत्रणेला ५० हजारांचा दंड, पुजाऱ्यालाही नोटीस
मध्यप्रदेशातील उज्जैन येथील प्रसिद्ध महाकाल मंदिरात दिल्लीच्या एका जोडप्याने एकमेकांच्या हातात अंगठी घालत साखरपुडा संपन्न केला आणि वाद निर्माण झाला. या वादानंतर मंदिर ट्रस्टकडून मोठी कारवाई करण्यात आली आहे.
सविस्तर वृत्त असे, उज्जैन येथील जगप्रसिद्ध बाबा महाकालेश्वर मंदिर परिसरात नियमांचे उल्लंघन करून इन्स्टाग्राम रील तयार करण्यावरून एक नवीन वाद निर्माण झाला आहे.
दिल्लीतील एका जोडप्याने व्हीआयपी प्रोटोकॉल व्यवस्थेचा गैरफायदा घेतला आणि मंदिरातील संवेदनशील भाग असलेल्या गणेश मंडपामधील त्यांच्या साखरपुड्याचा आणि अंगठी घालण्याचा सोहळ्याचा व्हिडिओ अपलोड केला. २६ मे रोजी अपलोड झालेला हा व्हिडिओ व्हायरल होताच, मंदिराची पवित्रता आणि सुरक्षा व्यवस्थेवर प्रश्नचिन्ह निर्माण झाले आहे.
मंदिर प्रशासनाने मोठी कारवाई केली
सोशल मीडियावर झालेल्या तीव्र टीकेनंतर, महाकाल मंदिर व्यवस्थापन समितीने २८ मे रोजी संपूर्ण प्रकरणाची अंतर्गत चौकशी सुरू केली. चौकशीत सुरक्षा आणि नियमांमध्ये मोठी हलगर्जीपणा झाल्याचे उघडकीस आल्यानंतर, मंदिर प्रशासनाने शुक्रवारी दोषी सुरक्षा एजन्सी आणि कर्मचाऱ्यांवर कठोर कारवाई केली. मंदिर परिसरात परवानगीशिवाय कोणत्याही प्रकारचे छायाचित्रण किंवा चित्रीकरण करण्यास सक्त मनाई आहे.
जनसंपर्क अधिकाऱ्याकडून अधिकृत निवेदन
या गंभीर निष्काळजीपणाच्या पार्श्वभूमीवर, मंदिर व्यवस्थापन समितीने खाजगी सुरक्षा एजन्सीवर ५०,००० रुपयांचा मोठा दंड आकारला आहे. व्हिडिओमध्ये दिसलेल्या परिचारकाला मंदिराच्या सर्व विशेष दरवाजांमधून प्रवेश करण्यावर कायमस्वरूपी बंदी घालण्यात आली आहे.
संबंधित प्रोटोकॉल अधिकारी आणि पुजारी यांना कडक ताकीद देण्यात आली असून, जबाबदार कर्मचाऱ्यांना कारणे दाखवा नोटीस बजावली जात आहे. आम्ही त्या जोडप्याविरुद्ध कायदेशीर कारवाईच्या शक्यतेचीही चौकशी करत आहोत.
आशिष फलवाडिया, जनसंपर्क अधिकारी (पीआरओ), महाकाल मंदिर समिती
परवानगीशिवाय रील्स बनवण्यावर बंदी
अधिकाऱ्यांनी स्पष्ट केले आहे की, महाकाल मंदिर परिसरात छायाचित्रण किंवा व्हिडिओग्राफी केवळ विशेष परिस्थितीत आणि प्रशासनाच्या लेखी परवानगीनेच करता येईल. वैयक्तिक प्रसिद्धी किंवा सोशल मीडियावरील मजकुरासाठी धार्मिक स्थळाचा वापर करणे हे मंदिराच्या नियमांचे थेट उल्लंघन आहे. या घटनेनंतर, महाकाल मंदिरातील मोबाईल फोनचा वापर आणि व्हीआयपींच्या प्रवेशासंबंधीचे नियम अधिक कडक करण्यात आले आहेत