बिबट्याच्या हल्ल्यात 2 वषीय बालक ठार

गुजरातमध्ये आठवड्यातील तिसरी घटना

वृत्तसंस्था/ गांधीनगर

गुजरातमधील अमरेली येथे रविवारी बिबट्याच्या हल्ल्यात एका दोन वर्षांच्या चिमुरड्याचा मृत्यू झाला. अमरेली गावात लहान मुलांवर प्राण्यांच्या हल्ल्याची ही आठवडाभरातील तिसरी घटना आहे. यापूर्वी सोमवारी बिबट्याच्या हल्ल्यात तीन वर्षांच्या चिमुरड्याचा मृत्यू झाला होता. तसेच दुसऱ्या दिवशी मंगळवारी पाच महिन्यांच्या मुलाला बिबट्याने ठार मारले होते.

आता रविवारी घडलेली घटना राजुला रेंजच्या जंगलातील कटार गावात घडली. बिबट्याच्या हल्ल्यावेळी बालक आपल्या कुटुंबीयांसोबत झोपले होते. बिबट्याने बालकाच्या गळ्याला पकडून जवळच्या झुडपात नेले. कुटुंबीयांनी आरडा-ओरड करताच बिबट्याने मुलाला तिथेच सोडून पळ काढला. कुटुंबीयांनी त्याला तातडीने ऊग्णालयात नेले. मात्र, पाहणीअंती डॉक्टरांनी त्याला मृत घोषित केले.