ऑडीचे 70 टक्के ग्राहक हे 50 वर्षांखालील

ऑडी इंडियाचे ब्रँड डायरेक्टर बलबीर : कंपनीच्या एसयूव्हीमधून 60 टक्के विक्री

वृत्तसंस्था, नवी दिल्ली

लक्झरी कारची मागणी आता दिल्ली-एनसीआरसारख्या मोठ्या शहरांपुरती मर्यादित राहिलेली नाही. टियर-2 शहरे, तरुण खरेदीदार आणि इलेक्ट्रिक वाहने या बाजारपेठेला नव्याने आकार देत आहेत. ऑडीच्या सुमारे 70 टक्के ग्राहक 50 वर्षांपेक्षा कमी वयाचे आहेत आणि प्रत्येक 3 ग्राहकांपैकी 1 ग्राहक आमचा पुन्हा खरेदी करणारा ग्राहक आहे. तरुण ग्राहकांसाठी लक्झरी म्हणजे केवळ कारची मालकी नसून तो एक अनुभव आहे असे, ऑडी इंडियाचे ब्रँड डायरेक्टर बलबीर सिंग ढिल्लो यांनी सांगितले आहे.

लखनौ, जयपूर, चंदीगड, डेहराडून आणि लुधियानासारख्या टियर-2 शहरांमध्ये वाढती समृद्धी, स्टार्टअप्स आणि लक्झरी कारची मागणी झपाट्याने वाढत आहे. आमच्या एसयूव्ही आणि परफॉर्मन्स कार या शहरांमधील ग्राहकांमध्ये खूप लोकप्रिय आहेत, ज्यासाठी आम्ही आमचे नेटवर्क, डिजिटल सेवा आणि विक्रीनंतरची सेवा अधिक मजबूत करत आहोत.

खराब रस्ते आणि जीवनशैलीच्या गरजांमुळे उत्तर भारतातील आमच्या एकूण विक्रीपैकी 60 टक्के विक्री एसयूव्हीची आहे. प्रत्येक ग्राहकाच्या पसंतीनुसार ऑडीकडे एसक्यू3, क्यू3 स्पोर्ट्स बॅक, क्यू5, क्यू 7, क्यू 8, आयएस क्यू 8  आणि नुकतीच लॉन्च झालेली एसक्यू8  यांसारख्या लक्झरी एसयूव्हीचा मोठा पोर्टफोलिओ आहे.

भारतातील लक्झरी ईव्हीच्या भविष्याबद्दल

आम्ही ऑडी ई-ट्रॉन रेंजसह भारतात लक्झरी ईव्ही क्रांतीचे नेतृत्व करत आहोत. आमचा विश्वास आहे की देशातील इलेक्ट्रिक मोबिलिटीचे भविष्य खूप उज्ज्वल आहे आणि आम्ही आमच्या ग्राहकांसाठी नवीन तंत्रज्ञान आणि उत्पादने आणत राहणार असल्याचा दावाही बलबीर सिंग ढिल्लो यांनी केला आहे.