कलबुर्गी जिल्ह्यात अपघातात एकाच कुटुंबातील 5 जण ठार

बेंगळूर :

कलबुर्गी जिल्ह्यात व्रूझर आणि ट्रक यांची समोरासमोर धडक बसून झालेल्या भीषण अपघातात एकाच कुटुंबातील पाचजण जागीच ठार झाले. ही हृदयद्रावक घटना शुक्रवारी मध्यरात्री चित्तापूर तालुक्यातील लाडलापूरजवळ राष्ट्रीय महामार्ग क्रमांक 150 वर घडली.

मृतांमध्ये मोहम्मद हुसेन शहा (वय 60), फातिमा अली (वय 38), रसूल बी. (वय 40), मेहबूब अली आणि व्रूझर चालक तोलूसाब पाशा (वय वय 24) यांचा समावेश आहे. ते सर्वजण चित्तापूर तालुक्यातील इंगळगी गावचे रहिवासी आहेत.

घटनेविषयी अधिक माहिती अशी, मोहम्मद अब्दुलसाब नामक व्यक्तीला रात्री अर्धांगवायूचा झटका आल्याने त्याला यादगीर येथील रुग्णालयात दाखल करण्यासाठी आठजण व्रूझरमधून गेले होते. रात्री 11:40 वाजता ते मोहम्मदला रुग्णालयात दाखल करून परत निघाले. दरम्यान, लाडलापूरजवळ महामार्गावर तामिळनाडू नोंदणीचा ट्रक आणि क्रूझर यांची समोरासमोर धडक बसली. या अपघातात क्रूझरमधील पाचजणांचा जागीच मृत्यू झाला. अपघातात क्रूझरचा चक्काचूर झाला. वाडी पोलीस स्थानकात या घटनेची नोंद झाली आहे.