कुर्टी-फोंडा येथे फ्लॅट फोडून 5 लाखांची चोरी

चोरीमुळे फोंडा पोलीस पुन्हा हतबल

फोंडा : फोंडा शहराला लागूनच असलेल्या नागा मशिद कुर्टी येथे एका फ्लॅटमध्ये चोरट्यांनी रविवारी मध्यरात्री प्रवेश करून दागिने व रोकडसह 5 लाख ऊपयांचा ऐवज  लंपास करून घटनास्थळावरून पळ काढल्याचा प्रकार काल सोमवारी सकाळी उघडकीस आला. फोंडा पोलीस स्थानकाच्या हद्दीत धुमाकूळ घालणाऱ्या चोरट्यांच्या 5 जणांच्या टोळीच्या मुसक्या आवळल्यानंतरही दोन दिवसात चोरट्यांनी पुन्हा डोके वर काढल्याने फोंडा पोलीस हतबल बनले आहेत. प्राप्त माहितीनुसार नागा मशिद कुर्टी येथील भरवस्तीतील फातिमा हायस्कूलच्या समोरील एका इमारतीच्या तळमजल्यावरील फ्लॅट फोडून चोरटे पसार झाले. फ्लॅटमधील  वयस्क जोडपे काही तासांसाठी बाहेर पडल्याची संधी साधून मध्यरात्रीच्या सुमारास मुख्य दरवाजा तोडून चोरट्यांनी आत प्रवेश करून ही चोरी केली. फ्लॅटमध्ये राहणारे वयस्क जोडपे शेजारच्या इमारतीत असलेल्या मुलांच्या फ्लॅटमध्ये पाहुणे आल्यामुळे त्यांची विचारपूस करण्यासाठी गेले असताना हा प्रकार घडला. चोरट्यांनी आतील कपाटे फोडून रोख व दागिने मिळून सुमारे पाच ते सहा लाखांचा ऐवज लंपास केल्याचा संशय व्यक्त करण्यात येत आहे. याप्रकरणी फोंडा पोलिसांनी घटनास्थळी पंचनामा केला असून सीसीटीव्ही कॅमेराची पडताळणी करण्यात येत आहे.