सराव शिबिरासाठी 33 सदस्यांची घोषणा
वृत्तसंस्था/ बेंगळूर
हॉकी इंडियातर्फे आगामी आंतरराष्ट्रीय हॉकी फेडरेशनच्या प्रो लीग हॉकी स्पर्धेसाठी महिला हॉकीपटूंकरिता सरावाचे शिबिर आयोजित केले असून या शिबिरासाठी 33 महिला हॉकीपटूंची निवड करण्यात आली असून त्यामध्ये अनुभवी गोलरक्षक सविता पुनिया आणि वंदना कटारिया यांचा समावेश आहे. या शिबिरासाठी 33 महिला हॉकीपटूं सहभागी होण्यास सज्ज झाल्या आहेत. सदर शिबिर 16 मे पर्यंत चालणार आहे.
हॉकी इंडियाने प्रारंभी या सराव शिबिराकरिता 60 हॉकीपटूंची निवड केली होती. त्यानंतर निवड चाचणीमध्ये हॉकीपटूंची संख्या कमी करण्यात आली. आता 33 संभाव्य महिला हॉकीपटूंची घोषणा करण्यात आली आहे. अलिकडेच राष्ट्रीय महिला हॉकी स्पर्धा घेण्यात आली होती. या स्पर्धेनंतर निवड चाचणीच्या जोरावर संभाव्य हॉकीपटूंची संख्या कमी करण्यात आली. भारतीय महिला हॉकी संघ अॅण्टवेर्प आणि लंडन येथे प्रयान करणार असून महिलांच्या प्रो लीग हॉकी स्पर्धेला 22 मे पासून प्रारंभ होत आहे. प्रो लीग हॉकी स्पर्धेत भारतीय महिला हॉकी संघाला अर्जेंटिना, बेल्जियम, जर्मनी आणि ब्रिटन संघांबरोबर लढती द्याव्या लागतील. 33 संभाव्य हॉकीपटूंच्या यादीमध्ये कर्णधार पुनिया, निकी प्रधान, सलीमा टेटे, अजमिना कुजुर, निशा, संगीता कुमार, वंदना कटारिया, लालरेमसियामी यांचा समावेश आहे.