विमानातील इंधन गळतीमुळे 149 प्रवासी अडचणीत

दाबोळी विमानतळावरील घटना, दुरुस्तीनंतर संध्याकाळी दुबईला प्रयाण

प्रतिनिधी/ वास्को

दाबोळी विमानतळावरून दुबईला प्रयाण करण्याच्या प्रतीक्षेत असलेल्या एका विमानात इंधन गळती आढळून आल्याने या विमानाचे उड्डाण रद्द करण्यात आले. शुक्रवारी रात्री हा प्रकार आढळून आला. या विमानात 149 प्रवासी होते. दुरूस्तीनंतर शनिवारी संध्याकाळी या विमानाने 107 प्रवाशांसह दुबईला प्रयाण केले.

एअर इंडिया कंपनीचे हे विमान शुक्रवारी रात्री दुबईला उड्डाण करणार होते. मात्र, उड्डाण करण्यापूर्वी होणाऱ्या नियमित चाचणीच्यावेळी या विमानातून इंधन गळती होत असल्याचे आढळून आले. त्यामुळे रात्रीचे विमानोड्डाण रद्द करण्यात आले. या समस्येमुळे दुबईकडे जाणारे 149 प्रवासी अडचणीत सापडले. शनिवारी पहाटेपासून शनिवारी संध्याकाळपर्यंत या विमानाचे दुरूस्तीकाम पूर्ण करण्यात आले. सुरक्षेची खात्री पटल्यानंतर संध्याकाळी या विमानाने 107 प्रवाशांसह दुबईला उड्डाण केले.