पिकलबॉल स्पर्धेत भारताला 10 पदके

वृत्तसंस्था/ मुंबई

नुकत्याच झालेल्या अमेरिकन खुल्या पिकलबॉल चॅम्पियनशिप स्पर्धेत 10 पदके मिळविणाऱ्या भारतीय संघाचे मायदेशी आगमन झाल्यानंतर त्यांचे जंगी स्वागत करण्यात आले. या स्पर्धेत भारताने तीन सुवर्ण, तीन रौप्य आणि चार कास्यंपदकांची कमाई केली.

या स्पर्धेमध्ये भारताच्या स्टेव्हा भसीन, धिरेन पटेल आणि हेमल जैन यांनी प्रत्येकी एक सुवर्णपदकाची कमाई केली. सदर स्पर्धा अमेरिकेतील फ्लोरिडा येथे 14 ते 20 एप्रिल दरम्यान घेण्यात आली होती. भसीनने कनिष्ठांच्या एकेरीत सुवर्णपदक तर धिरेन पटेलने पुरूषांच्या एकेरीत 5.0 प्रकारात सुवर्णपदक तसेच हेमल जैनने पुरूष एकेरीच्या 3.5 कॅटेगिरीत सुवर्णपदक मिळविले. भसीनने पुरूषांच्या दुहेरी 5.0 कॅटेगिरीत रौप्यपदक तसेच त्याने कनिष्ठ पुरूषांच्या दुहेरी आणि कनिष्ठ मिश्र दुहेरीत प्रत्येकी एक कास्य अशी एकूण चार पदकांची कमाई केली. रोनव मोटानिने पुरूषांच्या दुहेरीत 5.0 कॅटेगिरीत तसेच कनिष्ठ एकेरीत दोन रौप्यपदके मिळविली. तसेच त्याने कनिष्ठ पुरूषांच्या दुहेरी कॅटेगिरीत कास्यपदक मिळविले. पुरूष एकेरीच्या 5.0 कॅटेगिरीत हिमांशू देवासकरने कास्यपदक घेतले. हर्ष मेहदा आणि अमन भाटिया यांना मात्र पुरूषांच्या प्रो दुहेरी पाचव्या स्थानावर समाधान मानावे लागले.