तिरुचिरापल्ली विमानतळावर 1.16 कोटीचे सोने जप्त

वृत्तसंस्था/ तिरुचिरापल्ली

तामिळनाडूच्या तिरुचिरापल्ली विमानतळावर मोठ्या प्रमाणावर सोने जप्त करण्यात आले आहे. सिंगापूरमधून आलेल्या एका प्रवाशाला एक कोटीपेक्षा अधिक किमतीच्या सोन्यासह पकडण्यात आले आहे. सीमाशुल्क विभागाने या कारवाईची माहिती दिली आहे. ग्रीन चॅनेल पार करण्याचा प्रयत्न करत असलेल्या एका प्रवाशाला एअर इंटेलिजेन्स युनिटच्या अधिकाऱ्यांनी रोखले होते. तपासणीदरम्यान त्याच्याकडून 1.605 किलोग्रॅम सोने जप्त करण्यात आले. या प्रवाशाने गुडघ्याखालील कपड्यांमध्ये पेस्टच्या स्वरुपात सोने लपविले होते.

जप्त करण्यात आलेल्या सोन्याच्या बाजारातील मूल्य 1.16 कोटी रुपये इतके आहे. प्रवासी स्कूट एअरलाइन्स टीआर562 च्या विमानाद्वारे सिंगापूरमधून दाखल झाला होता. याप्रकरणी आता पुढील तपास केला जात आहे.  तिरुचिरापल्ली विमानतळावर मे महिन्यात 3 प्रवाशांना अटक करण्यात आली होती, त्यांच्याकडून 16.17 लाख रुपये किमतीचे सोने जप्त करण्यात आले होते.