महेश बाबूचा ‘गुंटूर कारम’ प्रदर्शित

सुपरस्टार महेशबाबूच्या चाहत्यांची प्रतीक्षा संपुष्टात आली आहे. तेलगू चित्रपट ‘गुंटूर कारम’ प्रदर्शित झाला आहे. दिग्दर्शक त्रिविक्रम श्रीनिवास आणि महेश बाबू यांची जोडी तिसऱ्यांदा ‘गुंटूर कारम’द्वारे एकत्र दिसून येणार आहे. महेश बाबूचे चाहते याचा ट्रेलर पाहून अत्यंत उत्साहीत झाले होते.

सुपरस्टार महेश बाबू या चित्रपटात ‘रमन रेड्डी ’ ही व्यक्तिरेखा साकारत आहे. व्यवस्थेच्या विरोधात लोकांच्या अधिकारांसाठी लढणारा, राग आल्यावर अॅक्शन करणारा आणि आनंदी झाल्यावर नाचणारा हा व्यक्ती असणार आहे. चित्रपटात राम्या कृष्णन ही स्वत:च्या मुलाला अनाथाप्रमाणे सोडून गेलेल्या मातेची भूमिका साकारत आहे.

महेश बाबू यापूर्वी ‘सरकारु वारी पाटा’ या चित्रपटात दिसून आली होती. त्यानंतर त्याचा कुठलाच चित्रपट प्रदर्शित झाला नव्हता. गुंटूर कारम या चित्रपटात महेश बाबू हा श्रीलीलासोबत रोमान्स करताना दिसून येणार आहे. या दोघांची जोडी प्रेक्षकांना अत्यंत पसंत पडली आहे. या चित्रपटात मीनाक्षी चौधरी देखील महत्त्वाच्या भूमिकेत आहे. गुंटूर कारम  चित्रपट 12 जानेवारी रोजी प्रदर्शित झाला.