फिर आई हसीन दिलरुबा’मध्ये तापसी

मे महिन्याच्या आसपास प्रदर्शित होणार

बॉलिवूड अभिनेत्री तापसी पन्नू अलिकडेच राजकुमार हिरानींकडून दिग्दर्शित ‘डंकी’ या चित्रपटात शाहरुख खानसोबत दिसून आली हीत. आता ती स्वत:चा आगामी चित्रपट ‘फिर आई हसीन दिलरुबा’साठी व्यग्र आहे. या चित्रपटात ती विक्रांत मैसी, सनी कौशल आणि जिमी शेरगिलसोबत झळकणार आहे. या चित्रपटाचे चित्रिकरण संपले आहे.

चित्रपट आता निर्मितीनंतरच्या टप्प्यात आहे. नेटफ्लिक्सकडून लवकरच या चित्रपटाच्या प्रदर्शनाची तारीख जाहीर केली जाणार आहे. हा चित्रपट मे महिन्यात प्रदर्शित होण्याची शक्यता असल्याचे तापसीने सांगितले आहे.

हसीन दिलरुबा हा चित्रपट नेटफ्लिक्सवर 2021 मध्ये प्रदर्शित झाला होता. यात विक्रांत मैसी आणि हर्षवर्धन राणे यांनी काम केले होते. याच चित्रपटाचा सीक्वेल आता लवकरच प्रेक्षकांच्या भेटीला येणार आहे. या चित्रपटाची कहाणी कनिका ढिल्लन यांनी लिहिली आहे. तर जयप्रद देसाई यांच्याकडून याचे दिग्दर्शन करण्यात आले आहे. आनंद एल. राय, हिमांशु शर्मा, भूषण कुमार आणि कृष्ण कुमार यांनी या चित्रपटाची निर्मिती केली आहे.

तापसी लवकरच कॉमेडी-ड्रामा चित्रपट ‘वो लडकी है कहां’मध्ये दिसून येणार आहे. या चित्रपटाची पटकथा आणि दिग्दर्शनाची जबाबदारी अरशद सैयद यांनी पेलली आहे. या चित्रपटात तापसीसोबत प्रतीक गांधी आणि प्रतीक बब्बर हे कलाकार दिसून येणार आहेत.