‘एंडिंग थिंग्स’मध्ये प्रियांका चोप्रा
मार्व्हलच्या सुपरहीरोसोबत झळकणार
बॉलिवूडपासून हॉलिवूडपर्यंत स्वतःच्या अभिनयाने वेगळे स्थान मिळविणारी अभिनेत्री प्रियांका चोप्रा आता नव्या चित्रपटावरून चर्चेत आहे. प्रियांका पुन्हा एकदा हॉलिवूडपटात ऍक्शन करताना दिसून येईल. हॉलिवूडचा प्रसिद्ध अभिनेता अँथोनी मॅकी याच्यासोबत चित्रपटात काम करणार आहे. अँथोनीने मार्व्हल स्टुडिओचा चित्रपट अव्हेंजर्समध्ये सुपरहीरोची भूमिका साकारली होती.
मॅकी आणि प्रियांका आता अमेझॉन प्राइम व्हिडिओचा प्रोजेक्ट एंडिंग थिंग्समध्ये काम करणार आहेत. या चित्रपटाचे दिग्दर्शन केविन सुलिवन करणार आहेत. एंडिंग थिंग्स प्रसिद्ध चित्रपट निर्माते जेम्स कॅमरून यांचा चित्रपट ट्रू लाइन्सच्या धर्तीवर साकारण्यात येणार आहे.
चित्रपटात प्रियांका आणि मॅकी यांची भूमिका कशाप्रकारची असेल याची अद्याप अधिकृत घोषणा करण्यात आलेली नाही. या चित्रपटावरून प्रियांका आणि मॅकी यांचे चाहते मात्र उत्सुक असून चित्रपटाची आतुरतेने प्रतीक्षा करत आहेत. प्रियांका आतापर्यंत अनेक हॉलिवूड चित्रपटांमधून झळकली आहे. काही दिवसांपूर्वी अभिनेता कियानू रिव्सचा बहुचर्चित चित्रपट द मॅट्रिक्स रिसरेक्शन्समध्ये ती दिसून आली होती. याचबरोबर तिने अमेझॉन प्राइम व्हिडिओची सीरिज ‘सिटाडेल’चे चित्रिकरण संपविले आहे.