दिल्लीत 3 महिन्यांची गर्भवती महिला अधिकाऱ्याचा मृत्यू; पतीसह सासरच्यांवर छळाचा आरोप, पोलिसांकडून तपास सुरू

नवी दिल्ली : दिल्लीत संरक्षण मंत्रालयात कार्यरत असलेल्या 3 महिन्यांच्या गर्भवती नाझिया खानम यांचा संशयास्पद परिस्थितीत मृत्यू झाल्याची घटना समोर आली आहे. नाझियाच्या मृत्यूनंतर तिच्या माहेरच्यांनी पती आणि सासरच्या मंडळींवर मानसिक तसेच शारीरिक छळाचे गंभीर आरोप केले आहेत. या प्रकरणी पोलिसांनी गुन्हा नोंदवून तपास सुरू केला आहे.

नाझियाला सासरच्या मंडळींकडून त्रास दिला जात असल्याचे तिने फोनद्वारे माहेरच्या कुटुंबीयांना सांगितल्याचा दावा करण्यात आला आहे. ती सातत्याने तणावाखाली असल्याची माहितीही कुटुंबीयांनी पोलिसांना दिली. या बाबींचा उल्लेख पोलिसांनी नोंदवलेल्या तक्रारीत करण्यात आला आहे.

21 ऑगस्टला कुटुंबाला मिळाली माहिती

नाझियाच्या कुटुंबीयांच्या म्हणण्यानुसार, 21 ऑगस्टला त्यांना फोन आला आणि नाझियाने आपले आयुष्य संपवल्याची माहिती देण्यात आली. ही बातमी मिळताच कुटुंबीयांना मोठा धक्का बसला.

मात्र, नाझियाने आत्महत्या केली नसून तिचा जीव घेण्यात आल्याचा गंभीर आरोप तिच्या कुटुंबीयांनी केला आहे. या प्रकरणाची निष्पक्ष चौकशी करून दोषींवर कठोर कारवाई करावी, अशी मागणी त्यांनी केली आहे.

पती आणि सासरच्यांची चौकशी

कुटुंबीयांच्या तक्रारीच्या आधारे पोलिसांनी गुन्हा नोंदवला असून, नाझियाच्या मृत्यूमागील नेमकी परिस्थिती शोधण्याचे काम सुरू आहे. तिचे दूरध्वनीवरील संभाषण, कुटुंबीयांशी झालेला संवाद आणि इतर परिस्थितीजन्य पुरावे तपासले जात आहेत.

नाझियाने कोणत्या परिस्थितीत टोकाचे पाऊल उचलले किंवा तिच्या मृत्यूमागे अन्य कोणते कारण आहे, याचा तपास पोलीस करत आहेत. पती अमजद अली खान आणि त्याच्या कुटुंबीयांची भूमिकाही तपासली जात आहे.

हुंड्याच्या कलमावरून कुटुंबीयांचा सवाल

गुन्हा नोंदवताना हुंड्याशी संबंधित कलमे लावण्यात आली नसल्याचा आरोप नाझियाच्या कुटुंबीयांनी केला आहे. पती अमजद अली खान आणि त्याच्या वडिलांच्या पोलिसांमध्ये ओळखी असल्याने आरोपी कुटुंबावर कारवाई होत नसल्याचा दावाही त्यांनी केला आहे.

मात्र, या आरोपांची स्वतंत्र पुष्टी झालेली नाही. नाझियाच्या मृत्यूचे नेमके कारण आणि आरोपांमध्ये तथ्य किती आहे, हे पोलिसांच्या तपासातून स्पष्ट होणार आहे.